By informohushqip 
Një person është gjetur pa shenja jete mëngjesin e sotëm në lagjen “Bregu i Diellit” në Prishtinë.
Rasti është raportuar rreth orës 08:00 në rrugën “Enver Maloku”, ndërsa në vendin e ngjarjes kanë dalë njësitet policore dhe ekipi mjekësor.
Lajmin e ka konfirmuar zëdhënësi i Policisë së Kosovës për rajonin e Prishtinës, Enis Pllana, i cili ka bërë të ditur se autoritetet kanë pranuar informatën për një person pa shenja jete.
“Sot rreth orës 08:00 kemi pranuar informatën për një person pa shenja jete në rrugën ‘Enver Maloku’ në Prishtinë”, ka deklaruar Pllana.
Pas mbërritjes në vendin e ngjarjes, ekipi mjekësor ka konstatuar se personi kishte humbur jetën.
Policia, në koordinim me Prokurorin e Shtetit, ka nisur hetimet për të përcaktuar rrethanat në të cilat ka ndodhur rasti.
“Policia në koordinim me prokurorin e shtetit ka nisur një hetim mbi vdekjen si dhe po vazhdon me ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rrethanave të rastit”, ka thënë Pllana.
Deri më tani nuk janë bërë publike të dhëna lidhur me identitetin, moshën apo gjininë e personit. Po ashtu, nuk është bërë i ditur shkaku që ka çuar në humbjen e jetës.
Për këtë arsye, në këtë fazë nuk mund të përcaktohet nëse bëhet fjalë për shkaqe natyrore apo rrethana të tjera. Hetimet dhe ekzaminimet e autoriteteve kompetente pritet të sqarojnë rrethanat e plota të rastit.
Policia nuk ka njoftuar deri tani për persona të dyshuar apo për ndonjë element tjetër që do të tregonte natyrën e ngjarjes.